Christmas Muru Taktak
Christmas Muru
Isai 7:14 / 9:6/ Johan 3:16/ Matt 1:21-23(CBC 207)
A hmasa bik ah vawlei kha pakpalawng ah a thlai i Minung kan ca’h a caan hman te’n a kal ter tu le a zohkhenh tu kan Pathian a min thangthat si ko seh.
Tuni ah thawngtha I ruah hna usih ti ka duhmi cu Christmas a Muru taktak hi zei dah a si? Tihi zoh ti hna u sih ti ka duh. Zeicahtiah Christmas hi tuah duh ti lo awk tiang in a thurhawm cang. Kan lai ram le kalay hrawng ah cun Jan-march kar nau a that mihi a tangmi thla kua chung I nau a that mi nakin an tam deuh tiah an chim ka theih bal. Cucu vawlei nih Christmas a lawmhnak theipar si.
A pakhat nak ah chim ka duhmi cu Christmas cu Pa Pathian nih a fapa ngeihchun te kha Misual kan caah a peek nak in aa thawk mi asi. Culawng hlah Fapa hrimhrim nih nawl ngai le lungtho tein a nun nak cu nang le kei caah lungawtawm nak um lo te’n a pek nak in aa thawk mi asi( Heb 10:5-7 / Isai 53:10-12). Pa Pathian lawng nih pe sehlaw Fapa nih a duh lo ah cun tlam a tling hnga lo Fapa lawng zong nih misual caah ka nun ka pek lai tisehlaw Pa nih ka fapa ngeih chunte pei na si cu kan siang lo a ti ah cun tlam a tling hlei hnga lo. Pa Pathian le Fapa Khrih hrimhrim nih an pahnih te’n misual nang le kei caah fapa nun nak an pek sian nak in aa thawkmi a si. Cuca’h Christmas a muru taktak cu Pek nak a si. Fapa nunnak hmanh Uilo te’n a kan pe siang tu Pa Pathian sin ah nang zeidah na pek ve? Nikhat ah Nazi 24 an pek, nazi pazeizat dah a caah na hman? Tuni tiang nun nak an hlanh mihi a mah caah zeizat dah na hman? Chaw le va thluachuah tampi an hrawmhmi hi a mah ram caah zei zat dah na hman? Na nunnak, na caan, le na thluachuah co mi vialte hi zeitin dah na hman? Khrih nih cun hitihin an auh “ nang cah keimah ka thi ka thi nang ca ka thlet nangmah kha kan tlanh I nunthan nak kha kan pek nangmah caah ka lu ka hloh kei ca zeidah na hloh? nang mah caah ka lu ka hloh kei ca zeidah na hloh”(CBC 207 V.1). nang mah na lung chung te’n mah biahal nak hi rak let ve tuah.
Pahinh nak ah chim ka duh micu Pa le Fapa Nih Fapa nunnak cu an pek lawngin a zaa lo. Sualnak tili pi chungah apil cang mi nang lei kei chanhchauh nak ding ah cun kan pilnak sualnak tili pi chungah cun pilve ahau cang. Van cung ah thah hruakin vawilei ah Fapa ruak kha kan sual thianh nak ding ah thlaktop a ngah lo. (Filipi 2) ah a chim bang vawilei ah a rat a hau cu. Vawlei ser hlan in a rak um cang mi (John 1:1-4) kha Ngaknu thiang Mary pawchung ah a derthawm ngaingai mi naute ah I can a hau cang cu(Isai 7:14). Cutikah Vancung sunparnak vialte, Fapa hniang sinak, nuamhnak, a Bawinak le lianngannak vialte cu kal tak a hau cang cu. Sihmanhsehlaw cu vial te cu zaangraam lo bak te’n a kal tak bak ko cu ee kan caah nau te ah cun a rung cang bak ko cu ee kan Pathian min thangthat si ko seh. Cuca’h Christmas a muru pahnih nak cu kaltak nun asi. Phundang in chim ah cun mah caah nung loin midang caah nun khi asi. Nihin ni ah zum tu unau kan caah a rami nau te caah nang zei dah na kaltak. Zumtu hi Khrih nih a kan duh tuk dah kaw a mah nakin kan nu le kan pa, kan fapa le fanu hmanh hi dawt deuh a kan sianh lo dah kaw(Matt 10:37). Cu lakah nang tah ziar ngeih nak lungthin te hna, I uah te hna, san a tlailomi zu tehna, sahdah tehan kunza, le Raza tehna nih an temtawn rih maw? Khrih nih hitihin an hal “ka pa umnak in tha…vancung a ceu umnak..vawlei ka um lio ah, a zapi ka chiah tak, a dih lak in ka chiahtak cang zei dah nang na chiahtak? A dih lak in ka chiah takcang zeidah nang na chaih tak?(CBC 207 V.2) kan caah a tha lo mi thil cu chimloin kan caah a tha tuk mi thil hmanh hi khrih nih a herh a ti ah cun kan kaltak a herh dah kaw u nau.
Pathumnak ah chim ka duh micu vawlei ah rat lawng khan a za hoi lo ee. Minung nih pawcawm nak caah an tuanmi rian kha a tuan ve a hau cu Van cung singpahrang rilmal dah kaw lettama hna a tuan cu, ti hna a than ve ko lai dah kaw rawl hna a chum ve ko lai dah kaw Hei tuak khawh an si ko cu. Hi hna cu va um ko seh mu van Siangpahrang Fapa ngeih chunte kha dah kaw a hmai ah cil an chak men ko cu, a mit hna an huh I an bengh men ko cu, bengh lawng a za lo, ho dah an beng kan chimtuah tiah nuamhnak ah an hman men ko cu, Pathian fa ka si nati ee nang mah le nang mah zong naa khamh khawh lo ee an ti an merhmuam cu an kam a keu hnawh cu, Vancung Siangpahrang dah kaw vawlei siangpahrang angki hna an hruk ter I siangpahrang cu saupi nung ko seh tiah tineek in a hmai ah an kun hnawh cu, Fung hna dahkaw an putter I siangpahrang tiah an auh cu a fung cun a lu ah an tuk than cu( matt 27:27-31/ Mark 15:29-32) . A ngaingai tiah cun Mi Fapa nih hin thazaang hman hau loin abia ka khat in a serhsat tu minung vialte hi second pakhat ah a thah dih khawh ko hna dah kaw. Thlichia le tilet hmanh nih a nawl an ngaihmi pa, Khuachia zong nih a hmaiah an kunmi pa, Nili a luan cangmi mithi hmanh tho a timen tu pa dahkaw asi cu. Zei ruangah hen aa in tthuptthi ko ee? Zei ruang ah hen a tuar thluagthluan ko? Nangle kei khamh kan si lai lo a phangtuk hme cu aw. Cuca’h a pathum nak Christmas a muru taktak cu tuarnun a si. Hitluk lawmmam in a intuarnak hi ka caah a si ko tiah a cohlang I khrih a zumtu khrihfa nang le kei nih tah zeidah a caah kan tuar ve tihi a biapi ngai ngai. Khrih caah na taur ciami tah zeizat dah a si I tuar ding le tuan ding ah naa timhmi tah zei dah an si hna tha tein ruah a hau cang unau. Khrih nih cun hitihin an hal than “nang caah a tam ka huah..holh chim khawh lo tiangin Hell in nang khamh awk ah..a fak bikmi kha ka in..nangmah caah a tam ka huah zeidah kei ca na in? nangmah caah a tam ka huah zeidah kei ca na in?(CBC 207 V.3) nang le kei nih kan intaur mi hna hi cu Khrih hmai ah chim ngam an si ngaingai te lai maw?
A dongh nak ah chim ka duhmi cu hi liangluang Pa Pathian dawtnak le Khrih dawtnak vialte hi a sawhsawh in tuahmi an si lo ruahchannak ngan pi he tuahmi an si. Cucu misual nang le kei hi Khrih thawngin miding/ mithiang fapa ah cohlan in a thianghlim tukmi Pa Pathian le Fapa Khrih he vancung khua ah hmunkhat te ah kan um khawh nak hnga caah a si. Sihmanhseh law van cung khua kan kai tikah Khrih nih hi ti hin a kan don te lai “vancung ka um nak in..khamhnak dawtnak kan put, tlanhnak a man loin..ka dawt sual thalhnak he, nangmah ca laksawng tha ka put kei ca zei dah na put? Nang mah ca laksawng tha ka put kei ca zei dah na put?. Khi tikah thlarau pakhat te tal kan put ve lo ah cun Bawipa hmai kan khap te hna lai lo dah kaw u nau. Nun nak pek tiangin a kan Dawtu Khrih caah zei te tal kan pe ve lai lo maw? Sunparnak vial te kal tak in sualmui lak ah a kan kawl tu khrih caah zei te tal kan kaltak ve lai lo maw? Kan caah a intaur nak vialte khi kan I lawm tuk ee ti men lawngin maw kan cohlan lai zei tal a caah kan tuan ve lai lo maw? Thawngtha a rel tu vialte Thlarau thianghlim nih hi vialte tuah kho dingin in bawm hram hna seh. Amen